ती च्या वळणावर

ती च्या वळणावर

आज सहजच वळलो
' ती ' च्या वळणावर
खूप पुढे गेलो आणि
आलो आपसूकच भानावर

' ती ' च वळणच तस होत
खट्याळ धुंद सुगंधी आकर्षक
कितीही थांबवू ( स्वतःला ) म्हटलं तरी
वळायचेच पाय आपोआप तिथवर

' ती ' ने काय नाही पाहिल
आमची टवाळी यारी दोस्ती
भेटी भांडण अन मस्ती
आणि कधी केलेली दुनियादारी

' ती ' च्या वळणाकडे वळत
जायचो हात हातात घालून
गप्पा टप्पा मौजमजा करत
शेवट व्हायचा समाधानी पोटपूजेत

पण मजेचे दिवस संपत गेले
मित्र देशी परदेशी उडून गेले
उरलेले आम्ही अडकलो लग्नबंधनी
हाय! आता ' ती ' ची आठवण फक्त स्वप्नी

मधूनच कधीतरी ' ती ' च वळण
आठवत खूप खूप विनाकारण
पण फिरकायचही नाही तिकड
हे मला ' स्वामिनी ' च साकड

तेलकट खाऊ नये म्हणते आमची 'ही '
हृदयाच्या धमन्या होतील ब्लौक
खातो आजकाल उकडलेल अन पुचाट
' ती ' करते मात्र डोक्यात क्लौक क्लौक

असे सरलेत किती वर्षे
माहित नाही ठेवतय कोण हिशोब
परवा मात्र दचकलोच ... कारण
पोरग वळल होत ' ती ' च्याच वळणावर

आज विचारांच्या तंद्रीत हरवलो होतो
अन ' ती ' च्या वळणावर वळलो होतो
मी ही मग मनाचा हिय्या केला
अन ' ती ' ला आज भेटण्याचा पणच केला

वळण सरल अन ' ती ' दिसली
मनोमनी स्वारी भलतीच खुश झाली
कित्येक वर्षांनी मी तिच्या खूप जवळ गेलो
उभा राहून शेजारी मागल पुढल बोललो

हळूच ' ती ' ने दिलेल्या प्रेमाचा
मोठ्या मनाने स्वीकार केला
अन अधाशासारखा घास
एका दमात पोटात ढकलला

काय म्हणता? काही लक्षात आल नाही
अहो अस काय करता....
' ती ' म्हणजे माझी आवडती
जुनीच ' वडापाव ' ची गाडी!!!

कल्याणी (शुभदा)
८ जुलै २०१८